பல்கலைக்கழகங்களுக்கிடையிலான மாணவர் சக்தி பேரவையின் அழைப்பாளர் வசந்த முதலிகேவை கைது செய்து தடுத்து வைத்தமை சட்டவிரோதமானது என உச்ச நீதிமன்றில் அடிப்படை உரிமை மீறல் மனுவொன்று தாக்கல் செய்யப்பட்டுள்ளது.
பொலிஸ் மா அதிபர், குற்றப் புலனாய்வுத் திணைக்களத்தின் பணிப்பாளர், பயங்கரவாதத் தடுப்புப் பிரிவின் பணிப்பாளர், பாதுகாப்புச் செயலாளர் மற்றும் சட்டமா அதிபர் ஆகியோர் பிரதிவாதிகளாக குறிப்பிடப்பட்டுள்ளனர்.
இதேவேளை, ஜனாதிபதி மாளிகைக்குள் அத்துமீறி பிரவேசித்த குற்றச்சாட்டில் விளக்கமறியலில் வைக்கப்பட்டிருந்த தனிஷ் அலி உள்ளிட்ட 10 சந்தேக நபர்களை விடுதலை செய்யுமாறு கொழும்பு கோட்டை நீதவான் திலின கமகே உத்தரவிட்டார்.
மேலும், இந்த சம்பவம் தொடர்பில் லஹிரு வீரசேகர மற்றும் மற்றுமொரு சந்தேகநபர் நீதிமன்றில் முன்னிலையானதன் பின்னர் 5 இலட்சம் ரூபா பெறுமதியான இரண்டு சரீரப் பிணைகளில் விடுவிக்கப்பட்டுள்ளனர்.
இதேவேளை, ஜனாதிபதி மாளிகையில் அத்துமீறி நுழைந்து படுக்கை விரிப்பை திருடிய குற்றச்சாட்டில் கைது செய்யப்பட்ட சந்தேகநபரை எதிர்வரும் 9ஆம் திகதி வரை விளக்கமறியலில் வைக்குமாறு கொழும்பு கோட்டை நீதவான் திலின கமகே இன்று உத்தரவிட்டுள்ளார்.
அத்துடன், பிரதமர் அலுவலகத்திற்குள் அத்துமீறி நுழைந்து சொத்துக்களுக்கு சேதம் விளைவித்த குற்றச்சாட்டில் விளக்கமறியலில் வைக்கப்பட்டிருந்த பியத் நிகேஷலா மற்றும் பலாங்கொட காஷ்யபா ஆகியோர் தலா 5 இலட்சம் ரூபா பிணையில் விடுவிக்கப்பட்டனர்.
இதேவேளை, ஜூலை 9 ஆம் திகதி கோட்டை ஜனாதிபதி மாளிகைக்குள் நுழைந்து சொத்துக்களை சேதப்படுத்தியமை மற்றும் மே 9 ஆம் திகதி கல்லுமுதுரை மீது தாக்குதல் நடத்திய மேலும் இருவர் கைது செய்யப்பட்டதாக பொலிஸ் ஊடகப் பேச்சாளர் அலுவலகம் தெரிவித்துள்ளது.
அத்துடன், அத்துமீறி நுழைந்து சொத்துக்களுக்கு சேதம் விளைவித்த குற்றச்சாட்டில் 36 சந்தேக நபர்களை கொழும்பு மத்திய பிரிவு குற்றப் புலனாய்வுப் பிரிவினர் கைது செய்துள்ளதாக இன்று நீதிமன்றத்தில் தெரியவந்துள்ளது.
அத்துடன், முன்னாள் ஜனாதிபதி கோட்டாபய ராஜபக்ச ஜூலை 9ஆம் திகதி விமானத்தில் இருந்து புறப்பட்டமை தொடர்பில் சமூக ஊடகங்களில் மேற்கொள்ளப்பட்ட பிரச்சாரம் தொடர்பில் வாக்குமூலம் பெறுவதற்காக சமூக ஊடக செயற்பாட்டாளர் நளின் ராஜபக்ஷ இன்று குற்றப் புலனாய்வு திணைக்களத்திற்கு அழைக்கப்பட்டுள்ளார்.
இதேவேளை, ஜூலை 9ஆம் திகதி தேசிய தொலைக்காட்சிக்குள் பலவந்தமாக பிரவேசித்ததாக குற்றம் சுமத்தப்பட்ட கெலும் அமரசிங்க மற்றும் தேசிய வர்த்தக அமைப்பின் உறுப்பினர்கள் குழு இன்று மனித உரிமைகள் ஆணைக்குழுவின் அதிகாரிகளை சந்தித்து கலந்துரையாடலில் ஈடுபட்டுள்ளனர்.
இதேவேளை, கடந்த மே மாதம் 9ஆம் திகதி நாடாளுமன்ற உறுப்பினர் சனத் நிஷாந்தவின் வீடு எரிக்கப்பட்ட சம்பவத்துடன் தொடர்புடைய 12 சந்தேக நபர்களை ஆராச்சிக்கட்டுவ பொலிஸார் கைதுசெய்துள்ளனர்.
பிற செய்திகள்
