கொழும்பு, பெப் 9: இலங்கையின் புலம்பெயர்ந்த தொழிலாளர்கள் அனுப்பும் ஒவ்வொரு அமெரிக்க டொலருக்கும் ரூ. 240 வழங்கப்பட வேண்டுமென்று கருவூலத்தில் இருந்து சிறப்பு கோரிக்கை விடுக்கப்பட்டுள்ளது என்று தொழிலாளர் நலத்துறை அமைச்சர் நிமல் சிறிபால டி சில்வா நாடாளுமன்றத்தில் தெரிவித்தார்.
நாடாளுமன்ற உறுப்பினர் மொஹமட் முஸம்மில் எழுப்பிய கேள்விக்கு பதிலளிக்கும் போதே அமைச்சர் இதனைத் தெரிவித்தார்.
புலம்பெயர்ந்த தொழிலாளர்கள் அனுப்பும் வெளிநாட்டுப் பணத்துக்கு அதிக மாற்று விகிதம் வழங்கப்படாவிட்டால், அவர்கள் அதிகாரப்பூர்வமற்ற வழிகளில் பணம் அனுப்ப முற்படுவார்கள் என்று கடந்த மாதம் நிமல் சிறிபால டி சில்வா கூறியிருந்தார். மேலும், அரசாங்கம் இந்தப் பிரச்சினைக்கு தீர்வுகாணத் தவறினால், இலங்கையின் பொருளாதார நெருக்கடியைத் தீர்ப்பதற்கு எடுக்கப்பட்ட நடவடிக்கைகள் தோல்வியடையும் என்றும் அவர் தெரிவித்திருந்தார்.
