இலங்கை – கட்டார் தொழிலாளர் ஒத்துழைப்பை வலுப்படுத்த நடவடிக்கை 
21 செப்டெம்பர் 2026 | தோஹா, கட்டார்
இலங்கைக்கும் கட்டாருக்கும் இடையிலான தொழிலாளர் மற்றும் வெளிநாட்டு வேலைவாய்ப்பு தொடர்பான ஒத்துழைப்பை மேலும் வலுப்படுத்துவது குறித்து, கட்டார் நாட்டின் தொழிலாளர் அமைச்சர் மாண்புமிகு டாக்டர் அலி பின் சயீத் பின் சமீக் அல் மர்ரி அவர்களை இன்று பிரதி வெளி விவகார அமைச்சர் அருண் ஹேமச்சந்திரா சந்தித்து உரையாடினார்
அவரின் பதிவு
இலங்கை – கட்டார் இராஜதந்திர உறவுகளின் 50ஆவது ஆண்டு நிறைவை முன்னிட்டு, திறமையான மற்றும் தொழில்முறை இலங்கைத் தொழிலாளர்களுக்கான வேலைவாய்ப்பு வாய்ப்புகளை விரிவுபடுத்துதல், தொழிலாளர்களின் நலன் மற்றும் பாதுகாப்பை வலுப்படுத்துதல், நியாயமானதும் வெளிப்படையானதுமான ஆட்சேர்ப்பு நடைமுறைகளை ஊக்குவித்தல், தொழில்முறை தகுதிகளுக்கான அங்கீகாரத்தை மேம்படுத்துதல் மற்றும் இரு நாடுகளின் சம்பந்தப்பட்ட நிறுவனங்களுக்கு இடையிலான ஒத்துழைப்பை அதிகரித்தல் உள்ளிட்ட விடயங்கள் குறித்து கலந்துரையாடினோம்.
தற்போது சுமார் 140,000 இலங்கையர்கள் கட்டாரில் பணியாற்றி வருகின்றனர். இதனால், தொழிலாளர் மற்றும் வெளிநாட்டு வேலைவாய்ப்பு துறைகள் இரு நாடுகளுக்கும் இடையிலான இருதரப்பு உறவுகளின் முக்கிய தூணாகத் திகழ்கின்றன.
பல ஆண்டுகளுக்குப் பின்னர் மீண்டும் கூட்டப்படும் இலங்கை – கட்டார் கூட்டு குழுவின் முக்கியத்துவத்தையும் நான் வலியுறுத்தினேன். தொழிலாளர்கள் மற்றும் தொழில் வழங்குநர்களுக்கு பயனளிக்கும் நடைமுறை நடவடிக்கைகளாக எமது கலந்துரையாடல்களை மாற்றுவதில் இந்தக் குழு முக்கிய பங்காற்றும்.
திறன் மேம்பாட்டை வலுப்படுத்துதல், தொழில்முறை தகுதிகளை பரஸ்பரம் அங்கீகரிப்பது தொடர்பான ஒத்துழைப்பை முன்னெடுத்தல், அத்துடன் திறமையான மற்றும் உயர்மதிப்புடைய வேலைவாய்ப்புகளில் இலங்கையர்களுக்கு அதிக வாய்ப்புகளை உருவாக்குதல் குறித்தும் கலந்துரையாடப்பட்டது.
கட்டார் நாட்டிற்கான இலங்கைத் தூதுவர் மாண்புமிகு சித்தாரா கான் மற்றும் இலங்கைத் தூதுக்குழுவின் உறுப்பினர்களும் இந்தச் சந்திப்பில் கலந்துகொண்டனர்.
இலங்கை – கட்டார் உறவுகளின் அடுத்த கட்டத்திற்குள் நாம் நுழையும் நிலையில், அதிக வேலைவாய்ப்பு வாய்ப்புகள், மேம்பட்ட திறன்கள், வலுவான தொழிலாளர் பாதுகாப்பு மற்றும் நெருக்கமான நிறுவன ரீதியான ஒத்துழைப்பு ஆகியவற்றை மையமாகக் கொண்ட வலுவான கூட்டாண்மையை உருவாக்குவதற்கு நாம் எதிர்பார்க்கின்றோம்.
