சர்வதேச கிரிக்கெட் நிர்வாகத்தின் வருடாந்திர புதுப்பிப்பினைத் தொடர்ந்து, ஐசிசியின் அண்மைய ஒருநாள் ஆடவர் கிரிக்கெட் அணிகள் தரவரிசையில் இலங்கை நான்காவது இடத்துக்கு முன்னேறியுள்ளது.
அதேநேரம், டெஸ்ட் போட்டிகளில் அவுஸ்திரேலியா தொடர்ந்து முதலிடத்தில் உள்ளது,
இரண்டு வெள்ளை பந்து வடிவ கிரிக்கெட்டிலும் (ஒருநாள், டி20) இந்தியா முன்னிலை வகிக்கிறது.
அதேநேரத்தில், வருடாந்திர ஐ.சி.சி தரவரிசை புதுப்பிப்பு அனைத்து வடிவங்களிலும் பெரிய மாற்றங்களைக் கொண்டுவருவதால் இலங்கை பெரிய வெற்றியாளர்களாக உருவெடுத்துள்ளது.
அண்மைய தரவரிசை, மே 2024 முதல் அணிகள் விளையாடிய அனைத்து போட்டிகளையும் 100 சதவீதமாகவும், அதற்கு முந்தைய இரண்டு ஆண்டுகளின் போட்டிகளை 50 சதவீதமாகவும் மதிப்பிடுகிறது.
டெஸ்ட் போட்டிகளில் அவுஸ்திரேலியா முன்னிலை
உலக டெஸ்ட் சாம்பியன்ஷிப்பை வென்ற அவுஸ்திரேலியா, ஐ.சி.சி ஆடவர் டெஸ்ட் அணி தரவரிசையில் முதலிடத்தைத் தக்க வைத்துக் கொண்டுள்ளது.
இருப்பினும் வருடாந்திர புதுப்பிப்புக்குப் பின்னர் அவர்களின் முன்னிலை 15 புள்ளிகளில் இருந்து 13 புள்ளிகளாகக் குறைக்கப்பட்டது.
பேட் கம்மின்ஸ் தலைமையிலான அணி 126 புள்ளிகளைப் பெற்று, முதலிடத்தில் உள்ளது.
அதேநேரம், பென் ஸ்டோக்ஸ் தலைமையிலான இங்கிலாந்து அணி தென்னாப்பிரிக்கா மற்றும் இந்தியாவை முந்தி இரண்டாவது இடத்திற்கு முன்னேறியது.
கடந்த ஆண்டில் நான்கு டெஸ்ட் தொடர்களில் மூன்றில் வெற்றி பெற்றதன் மூலம் அவர்களின் நிலை மேம்பட்டுள்ளது.
இங்கிலாந்தின் மதிப்பீட்டு புள்ளிகள் 113 ஆக உயர்ந்தன.
அதே நேரத்தில் தென்னாப்பிரிக்கா (111) மற்றும் இந்தியா (105) தலா ஒரு இடம் சரிந்து முறையே மூன்றாவது மற்றும் நான்காவது இடத்திற்கு வந்தன.
முதல் 10 இடங்களில் மீதமுள்ள அணிகள் மாறாமல் உள்ளன.
நியூசிலாந்து ஐந்தாவது இடத்தைப் பிடித்துள்ளது.
அதைத் தொடர்ந்து இலங்கை, பாகிஸ்தான், மேற்கிந்தியத் தீவுகள், பங்களாதேஷ் மற்றும் ஜிம்பாப்வே ஆகியவை உள்ளன.
டெஸ்ட் தரவரிசையில் தற்போது 10 அணிகள் மட்டுமே தரவரிசையில் உள்ளன.
தரவரிசைக்கு தகுதி பெற அயர்லாந்து அடுத்த 12 மாதங்களில் இன்னும் ஒரு டெஸ்ட் போட்டியில் விளையாட வேண்டும்.
அதே நேரத்தில் ஆப்கானிஸ்தான் பட்டியலில் சேர இன்னும் மூன்று போட்டிகளில் விளையாட வேண்டும்.
ஒருநாள் தரவரிசையில் இந்தியா முதலிடம், இலங்கை குறிப்பிடத்தக்க முன்னேற்றம்
2025 ஐசிசி சாம்பியன்ஸ் டிராபி வெற்றியின் மூலம், ஒருநாள் தரவரிசையில் இந்தியா முதலிடத்தில் தனது பிடியை வலுப்படுத்தியுள்ளது.
அதன் மதிப்பீட்டு புள்ளிகளை 122 லிருந்து 124 ஆக உயர்த்தியுள்ளது.
சாம்பியன்ஸ் டிராபியில் இரண்டாம் இடத்தைப் பிடித்த நியூசிலாந்து, அவுஸ்திரேலியாவை முந்தி இரண்டாவது இடத்தைப் பிடித்தது.
அவுஸ்திரேலியா இப்போது மூன்றாவது இடத்தைப் பிடித்துள்ளனர்.
இந்தியா மற்றும் ஆஸ்திரேலியாவுக்கு எதிரான ஒருநாள் தொடர் வெற்றிகள் உட்பட அண்மைய மாதங்களில் சொந்த மண்ணில் அபாரமாக விளையாடிய இலங்கை, 104 மதிப்பீட்டு புள்ளிகளைப் பெற்று நான்காவது இடத்தில் உள்ளது.
இந்த செயல்பாட்டில் பாகிஸ்தானை (ஒரு புள்ளி முன்னேற்றத்துடன் ஐந்தாவது இடம்) மற்றும் தென்னாப்பிரிக்காவை (நான்கு புள்ளிகள் இழப்புடன் ஆறாவது இடம்) முந்தி முன்னேறியுள்ளது.
நான்கு புள்ளிகள் குறைந்து எட்டாவது இடத்திற்கு சரிந்த முன்னாள் உலக சாம்பியனான இங்கிலாந்துக்கு பதிலாக, நான்கு புள்ளிகள் முன்னேற்றத்துடன் ஆப்கானிஸ்தான் ஏழாவது இடத்திற்கு முன்னேறியது.
இதற்கிடையில், மேற்கிந்திய தீவுகள் அணி ஐந்து புள்ளிகள் அதிகரித்து ஒன்பதாவது இடத்திற்கு உயர்ந்து.
நான்கு புள்ளிகள் சரிவுடன் பங்களாதேஷ் பத்தாவது இடத்தில் உள்ளது.
டி20 வடிவிலும் இந்தியா முதலிடம்
டி20 போட்டிகளில், தற்போதைய ஐசிசி ஆடவர் டி20 உலகக் கிண்ண சாம்பியனான இந்தியா முதலிடத்தில் உள்ளது.
இருப்பினும் இரண்டாவது இடத்தில் உள்ள அவுஸ்திரேலியாவை விட அவர்களின் முன்னிலை 10 புள்ளிகளில் இருந்து ஒன்பது புள்ளிகளாகக் குறைந்துள்ளது.
2022 பதிப்பு சாம்பியனான இங்கிலாந்து மூன்றாவது இடத்தில் உள்ளது, நியூசிலாந்து, மேற்கிந்திய தீவுகள் மற்றும் தென்னாப்பிரிக்கா முறையே நான்கு, ஐந்து மற்றும் ஆறு இடங்களில் உள்ளன.
ஆட்டத்தின் குறுகிய வடிவத்திலும் இலங்கையின் எழுச்சி தொடர்கிறது.
ஆசிய போட்டியாளர்களான பாகிஸ்தானை (8) முந்தி தரவரிசையில் இப்போது 7 ஆவது இடத்தில் அவர்கள் உள்ளனர்.
பங்களாதேஷ் மற்றும் ஆப்கானிஸ்தான் முறையே ஒன்பதாவது மற்றும் பத்தாவது இடங்களில் தங்கள் சக ஆசிய அணிகளைத் தொடர்ந்து வருகின்றன.
முதன்முறையாக, வருடாந்திர புதுப்பிப்பில் உலகளாவிய டி20ஐ தரவரிசையில் 100 அணிகள் இடம்பெற்றுள்ளன.
புதுப்பிக்கப்பட்ட பட்டியலில் கடந்த மூன்று ஆண்டுகளில் குறைந்தது எட்டு டி20ஐ விளையாடிய அனைத்து அணிகளும் அடங்கும்.
அசல் உலகளாவிய டி20ஐ தரவரிசை 2019 இல் தொடங்கப்பட்டது மற்றும் 80 அணிகளை உள்ளடக்கியிருந்தமையும் குறிப்பிடத்தக்கது.
