2025 இந்தியன் பிரீமியர் லீக் தொடரில் நேற்றிரவு (25) நடைபெற்றப் போட்டியில் கொல்கத்தா நைட் ரைடர்ஸ் (KKR) அணியை சன்ரைசர்ஸ் ஹைதராபாத் (SRH) அணி 110 ஓட்டங்களினால் தோற்கடித்தது.
இதன் மூலம் SRH அணியானது 2025 ஐ.பி.எல். சீசனை வெற்றியுடன் நிறைவு செய்தது.
நடப்பு ஐ.பி.எல். தொடரின் 68 ஆவது போட்டியானது நேற்றிரவு 07.30 மணிக்கு டெல்லியில் அமைந்துள்ள அருண் ஜெட்லி மைதானத்தில் ஆரம்பமானது.
போட்டியில் நாணய சுழற்சியில் வெற்றி பெற்ற SRH அணியாது முதலில் துடுப்பெடுத்தாட தீர்மானித்தது.
ராஜஸ்தான் ரோயல்ஸ் அணிக்கு எதிராக 286 ஓட்டங்களை குவித்து இந்த சீசனில் சாதனை படைத்த SRH அணி, லீக் கட்டத்தை நிறைவு செய்ய இதேபோன்ற ஆதிக்க பேட்டிங்கை வெளிப்படுத்தியது.
அதன்படி, முதலில் துடுப்பெடுத்தாட ஆரம்பித்த பேட் கம்மின்ஸ் தலைமையிலான அணியானது 20 ஓவர்களில் 3 விக்கெட் இழப்புக்கு 278 ஓட்டங்களை குவித்தது.
KKR அணியின் மந்தமான பந்துவீச்சு அணியை மகத்தான இலக்கை நோக்கி அழைத்துச் செல்ல SRHக்கு மிகவும் உதவியாக இருந்தது.
ஹென்ரிச் கிளாசென் 37 பந்துகளில் அபார சதம் அடித்து KKR அணியின் பந்துவீச்சை சிதறடித்தார்.
அதே நேரத்தில் டிராவிஸ் ஹெட் அபாரமான ஆட்டத்தை வெளிப்படுத்தி 40 பந்துகளில் 76 ஓட்டங்களை எடுத்தார்.
இது தவிர ஆரம்ப துடுப்பாட்ட வீரரான அபிஷேக் சர்மா 16 பந்துகளில் 32 ஓட்டங்களையும், இஷான் கிஷான் 20 பந்துகளில் 29 ஓட்டங்களையும் எடுத்து இந்த இமாலய இலக்கில் SRH அணிக்காக தங்களின் பங்களிப்பினை வழங்கினர்.
பின்னர் 279 என்ற இமாலய இலக்கினை நோக்கி பதிலுக்கு துடுப்பெடுத்தாடிய அஜிங்க்யா ரஹானே தலைமையிலான அணியால் 18.4 ஓவர்களுக்கு அனைத்து விக்கெட்டுகளையும் இழந்து 168 ஓட்டங்களை மாத்திரம் பெற முடிந்தது.
அந்த அணி சார்பில் மணீஷ் பாண்டே மாத்திரம் அதிகபடியாக 37 ஓட்டங்களை எடுத்தார்.
SRH அணி சார்பில் பந்து வீச்சில் ஜெய்தேவ் உனத்கட், எஷான் மலிங்க மற்றும் ஹர்ஷ் துபே ஆகியோர் தலா 3 விக்கெட்டுகளையும் அதிகபடியாக வீழ்த்தினர்.
இந்த வெற்றியானது நடப்பு சீசனில் SRH பெற்றுக் கொண்ட ஆறாவது வெற்றியாகும்.
தற்சமயம் அவர்கள் புள்ளிகள் தரவரிசையில் 13 புள்ளிகளை பெற்று ஆறாவது இடத்தில் உள்ளனர்.
போட்டியின் ஆட்டநாயனாக ஹென்ரிச் கிளாசென் தெரிவானார்.
இதேவேளை, நேற்று மாலை நரேந்திர மோடி மைதானத்தில் நடந்த 2025 ஐ.பி.எல். தொடரின் மற்றொரு போட்டியில் சென்னை சூப்பர் கிங்ஸ் (CSK) அணியானது 83 ஓட்டங்களால் பிளேஆஃப் சுற்றுக்கு முன்னதாகவே தகுதி பெற்ற குஜராத் டைட்டன்ஸ் (GT) அணியை வீழ்த்தியது.
இந்த வெற்றியானது நடப்பு ஐ.பி.எல். சீசனில் தோனி தலைமையிலான CSK அணி பெற்றுக் கொள்ளும் நான்காவது வெற்றியாகும்.
போட்டியில் நாணய சுழற்சியில் வெற்றி பெற்று முதலில் துடுப்பெடுத்தாடிய CSK அணியானது 20 ஓவர்கள் நிறைவில் 5 விக்கெட் இழப்புக்கு 230 ஓட்டங்களை குவித்தது.
இன்னிங்ஸில் டெவோன் கான்வே (52 ஓட்டம்) டெவால்ட் பிரெவிஸ் (57 ஓட்டம் ) ஆகியோர் அரைசதம் விளாசினர்.
பின்னர் பதிலுக்கு துடுப்பெடுத்தாடிய சுப்மன் கில் தலைமையிலான GT அணியானது 18.3 ஓவர்களுக்கு அனைத்து விக்கெட்டுகளையும் இழந்து 147 ஓட்டங்களை மாத்திரம் பெற்று தோல்வி கண்டது.
ஆரம்ப வீரரான சாய் சுதர்சன் மாத்திரம் 28 பந்துகளில் 41 ஓட்டங்களை அதிகபடியாக எடுத்தார்.
பந்து வீச்சில் CSK அணி சார்பில் அன்ஷுல் காம்போஜ் மற்றும் நூர் அகமட் ஆகியோர் தலா 3 விக்கெட்டுகளையும், ரவீந்திர ஜடேஜா 2 விக்கெட்டுகளையும் அதிகபடியாக வீழ்த்தினர்.
போட்டியின் ஆட்டநாயகனாக டெவால்ட் பிரெவிஸ் தெரிவானார்.
இந்தத் தோல்வியின் மூலம், புள்ளிகள் பட்டியலில் முதல் 2 இடங்களுக்குள் வரும் GT அணியின் நம்பிக்கை கடுமையாக கேள்விக்குறியாகியுள்ளது.
திங்கட்கிழமை மும்பை இந்தியன்ஸ் மற்றும் பஞ்சாப் கிங்ஸ் அணிகளுக்கு இடையிலான மோதலில் வெற்றி பெறும் அணி, புள்ளிப்பட்டியலில் அவர்களை விட முன்னேறும்.
மேலும் இந்த சீசனின் கடைசி லீக் ஆட்டத்தில் லக்னோ சூப்பர் ஜெயண்ட்ஸை வீழ்த்தினால் ரோயல் சேலஞ்சர்ஸ் பெங்களூரு அணி முதல் இரண்டு இடங்களுக்குள் முன்னேறலாம்.
