நாட்டில் தற்போது வேகமாகப் பரவி வரும் இன்புளுவென்சா வைரஸ் தொற்றினால் கர்ப்பிணிப் பெண்கள் அதிகளவில் பாதிக்கப்படும் அபாயம் காணப்படுவதாக மகப்பேற்று மற்றும் பெண் நோயியல் நிபுணர் பேராசிரியர் சனத் லனரோல் எச்சரித்துள்ளார்.
கொழும்பில் நேற்று (10) நடைபெற்ற ஊடகவியலாளர் சந்திப்பின்போதே அவர் இதனைத் தெரிவித்துள்ளார்.
கர்ப்ப காலத்தில் ஏற்படும் உடலியல் மற்றும் நோய் எதிர்ப்புச் சக்தி தொடர்பான மாற்றங்கள் காரணமாக, கர்ப்பிணிப் பெண்களுக்கு இன்புளுவென்சா தொற்றினால் கடுமையான பாதிப்புகள் ஏற்படும் அபாயம் அதிகமாகக் காணப்படுகின்றது.
எனவே, கர்ப்பிணிப் பெண்கள் இன்புளுவென்சா தொற்றிலிருந்து தங்களைப் பாதுகாத்துக்கொள்வதில் கூடுதல் கவனம் செலுத்த வேண்டும் என வலியுறுத்தப்பட்டுள்ளது.
குறிப்பாக, இன்புளுவென்சா தொற்றிலிருந்து பாதுகாப்புப் பெறுவதற்காக கர்ப்பிணிப் பெண்கள் அதற்கான தடுப்பூசியைப் பெற்றுக்கொள்ள முடியும் எனவும் பேராசிரியர் சனத் லனரோல் தெரிவித்துள்ளார்.
அத்துடன், காய்ச்சல், இருமல் மற்றும் சுவாசிப்பதில் சிரமம் போன்ற அறிகுறிகள் தென்பட்டால் தாமதமின்றி மருத்துவ ஆலோசனையைப் பெற்றுக்கொள்வது அவசியமாகும்.
