ராஜபக்ஸ அரசாங்கம் நாட்டு மக்களை நடு வீதிக்கு கொண்டு வந்து விட்டுள்ளது. இயலாமையுடன் செயற்படும் இந்த அரசாங்கத்தை விரட்டியடிப்பதற்கு மக்கள் தயாராகிவிட்டனர் என தமிழ் முற்போக்கு கூட்டணியின் தலைவர் மனோ கணேசன் தெரிவித்தார்.
பொருட்களின் விலை உயர்வுக்கு எதிராக தலவாக்கலை நகரில் இன்று நடைபெற்ற போராட்டத்தின் போதே அவர் இவ்வாறு தெரிவித்துள்ளார்.
மேலும், தோட்டத் தொழிலாளர்கள், ஆசிரியர்கள், மீனவர்கள், விவசாயிகள் என அனைவரையும் ராஜபக்ஸ அரசாங்கம் நடுவீதிக்கு கொண்டுவந்துவிட்டது.
ஏற்கனவே, பொருளாதாரப் பிரச்சினையால் பாதிக்கப்பட்டுள்ள தோட்டத் தொழிலாளர்கள் தற்போதைய விலை உயர்விலும் பாதிக்கப்பட்டுள்ளனர்.
இவர்களுக்காக எவரும் குரல் எழுப்புவதில்லை. தமிழ் முற்போக்கு கூட்டணியே குரல் எழுப்புகின்றது. இன்று தலவாக்கலையில் நடைபெறும் போராட்டம் மலையகம் எங்கும் முன்னெடுக்கப்படும்.
தோட்டத் தொழிலாளர்களுக்கு ஆயிரம் ரூபா வழங்கப்படும் எனக்கூறி ஏமாற்றியுள்ளனர். இன்று தோட்டங்கள் கம்பனிகளிடம் அடகு வைக்கப்பட்டுள்ளன.
இந்த அரசாங்கத்தால் எதுவும் முடியாது. முடியாதவர்கள் வீட்டுக்கு செல்வதே நல்லது என அவர் தெரிவித்துள்ளார்.