இமய மலைப் பிரகடனத்தின் ஏற்ப்பாட்டாளர்களான உலகத் தமிழர் பேரவை உறுப்பினர்களின் பதாதைகளுக்கு வவுனியா காணாமல் ஆக்கப்பட்ட உறவுகளால் இன்றையதினம்(25) முட்டை வீசி தாக்குதல் மேற்க்கொள்ளப்பட்டது.
தமிழர் தாயக காணாமல் ஆக்கப்பட்டோரின் சங்கத்தினால் முன்னெடுக்கப்பட்டுவரும் சுழற்சிமுறை உணவுத்தவிர்ப்பு போராட்டம் ஆரம்பிக்கப்பட்டு இன்றுடன் 2500 நாட்கள் முடிவடைகின்றது. இதனையடுத்து இன்றையதினம்(25) காலை அவர்களால் கவனயீர்ப்பு போராட்டம் ஒன்று முன்னெடுக்கப்பட்டது.
இதன்போதே உலகத்தமிழர் பேரவையின் உறுப்பினர்களது பதாதைகளுக்கு முட்டைவீசித்தாக்குதல் மேற்கொண்டதுடன் அவர்களால் வெளியிடப்பட்ட இமயமலை பிரகடணத்திற்கும் தமது எதிர்ப்பை வெளியிட்டிருந்தனர்.
இதன்போது கருத்து தெரிவித்த அவர்கள்,
பேராசை மற்றும் பிரபல்யத்திற்காகவே உலகத்தமிழர் பேரவையினர் சிங்களவர்களின் வால் பிடித்துள்ளனர். உண்மையில் நல்லிணக்கம் என்ற கருத்து சிங்கள சமூகத்தின் நம்பிக்கைகளுக்கு இணையானதல்ல; மாறாக, தமிழ் மக்களின் அபிலாஷைகளைப் பிரதிநிதித்துவப்படுத்துவதாகும்.
கடந்த 14 ஆண்டுகளில், இனப் போர் முடிவுக்கு வந்ததைத் தொடர்ந்து, LLRC, UNHRC தீர்மானம் மற்றும் நல்லிணக்கம் போன்ற வார்த்தைகள் அதிகளவில் பிரபலமடைந்து வருவதை தமிழர்கள் கண்டறிந்துள்ளனர். இருப்பினும், உண்மையில், நடைபெறும் நிகழ்வுகள் நல்லிணக்கக் கொள்கைகளுக்கு முரணானதாகவே தெரிகிறது.
தமிழ் மக்களின் அபிலாஷை தமிழ் இறையாண்மையாகும், அதனை பொதுவாக்கெடுப்பு மூலம் தீர்மானிக்க முடியும்.
காணாமல் போன தமிழ் பிள்ளைகளின் இருப்பிடத்தை வெளிப்படுத்துவதும் இந்த அநீதிக்கு காரணமான நபர்களை அம்பலப்படுத்துவதும் நல்லிணக்கத்திற்கான முதல் படியாகும்.
அக்கறையுள்ள தாய்மார்களாக, நாங்கள் எங்கள் குழந்தைகளுடன் மீண்டும் ஒன்றிணைவதற்கு ஏங்குகிறோம். எங்கள் அன்புக்குரியவர்களை சட்டவிரோதமாக கைப்பற்றுவதற்கு பொறுப்பான நபர்களின் விரிவான பட்டியலை நாங்கள் கோருகிறோம்.
நீதியை உறுதி செய்வதற்காக, இந்த நபர்கள் பொறுப்புக் கூறுவது கட்டாயமாகும், ஏனெனில் அவர்களின் தண்டனை எதிர்காலத்தில் பலவந்தமாக காணாமல் ஆக்கப்படுவதைத் தடுக்கும் எனவும் தெரிவித்தனர்.
