2025 இந்தியன் பிரீமியர் லீக் தொடரில் நேற்றிரவு (08) நடந்த போட்டியில் பஞ்சாப் கிங்ஸ் (PBKS) அணியானது சென்னை சூப்பர் கிங்ஸ் அணியை (CSK) 18 ஓட்டங்கள் வித்தியாசத்தில் தோற்கடித்தது.
இந்தப் போட்டியில் 24 வயதான பிரியான்ஷ் ஆர்யா தனது முதல் ஐ.பி.எல். சதத்தை பதிவு செய்தார்.
பஞ்சாப் அணியின் ஆரம்ப துடுப்பாட்ட வீரர் மொத்தமாக 42 பந்துகளை எதிர்கொண்டு 9 சிக்ஸர்கள், 7 பவுண்டரிகள் அடங்கலாக 103 ஓட்டங்களை எடுத்தார்.
இவர் வெறும் 39 பந்துகளில் தனது சதத்தை எட்டினார்.
ஐ.பி.எல். வரலாற்றில் ஐந்தாவது வேகமான மற்றும் யூசுப் பதானுக்குப் பின்னர் ஒரு இந்தியரின் இரண்டாவது வேகமான சதம் இதுவாகும்.
இவரின் அதிரடியான துடுப்பாட்டத்துடன், ஷஷாங்க் சிங் (52) மற்றும் மார்கோ ஜான்சன் (34) ஆகியோரின் மகத்தான துடுப்பாட்டத்தாலும் போட்டியில் முதலில் துடுப்பெடுத்தாடிய பஞ்சாப் அணி 20 ஓவர்கள் நிறைவில் 6 விக்கெட் இழப்புக்கு 219 ஓட்டங்களை குவித்தது.
தட்டையான ஆடுகளம் இருந்தபோதிலும், சென்னை அணியின் பந்து வீச்சாளர்கள் சிரமப்பட்டனர்.
எனினும் கலீல் அகஹமட் (2/45) மற்றும் ரவிச்சந்திரன் அஷ்வின் (2/48) ஆகியோர் தலா 2 விக்கெட்டுகளை வீழ்த்தினர்.
பதிலுக்கு துடுப்பெடுத்தாடிய சென்னை அணியால் 20 ஓவர்கள் முடிவில் 5 விக்கெட் இழப்புக்கு 201 ஓட்டங்களை மாத்திரம் எடுக்க முடிந்தது.
டெவன் கான்வேயின் நிலையான 69 (49) ஓட்டங்களும், எம்.எஸ். தோனியின் (12 பந்துகளில் 27) ஆட்டமும் இருந்தபோதிலும் தோல்வியைத் தழுவியது.
சென்னையின் துடுப்பாட்டத்தில் மிடில் ஓவர்களில் வேகம் குறைவாக இருந்ததால், பஞ்சாப் அணிக்கு இந்த சீசனில் மூன்றாவது வெற்றி கிடைத்தது.
அதேநேரம், தொடரில் சென்னை அணி தழுவும் நான்காவது தோல்வியாகவும் இது அமைந்தது.
இதேவேளை, கொல்கத்தாவில் நேற்று மாலை நடந்த மற்றொரு ஐ.பி.எல். போட்டியில், நிக்கோலஸ் பூரன் தனது அற்புதமான இன்னிங்ஸால் ஈடன் கார்டன்ஸ் மைதானத்தை ஒளிரச் செய்தார்.
இந்த ஆட்டத்தில் லக்னோ சூப்பர் ஜெயண்ட்ஸ் அணி (LSG), கொல்கத்தா நைட் ரைடர்ஸ் அணியை (KKR) நான்கு ஓட்டங்களால் வீழ்த்தியது.
போட்டியில் முதலில் துடுப்பெடுத்தாடிய லக்னோ 20 ஓவர்களுக்கு 3 விக்கெட் இழப்புக்கு 238 ஓட்டங்களை பெற்றது.
துடுப்பாட்டத்தில் ஐடன் மார்க்ராம் 43 (28) ஓட்டங்களையும், மிட்செல் மார்ஷ் 81 (48) ஓட்டங்களையும் மற்றும் நிக்கோலஸ் பூரன் 87 (36) ஓட்டங்களையும் அதிகபடியாக பெற்றனர்.
பின்னர், ரிங்கு சிங் மற்றும் வெங்கடேஷ் அய்யரின் அதிரடியுடன் இந்த சேஸிங்க்காக கொல்கத்தா வீரத்துடன் போராடியது.
எனினும், 20 ஓவர்கள் நிறைவில் 7 விக்கெட் இழப்புக்கு 234 ஓட்டங்களை மாத்திரமே எடுக்க முடிந்தது.
அணித் தலைவர் அஜிங்க்யா ரஹானே 35 பந்துகளில் 61 ஓட்டங்களையும், வெங்கடேஷ் அய்யர் 29 பந்துகளில் 45 ஓட்டங்களையும் மற்றும் ரிங்கு சிங் 15 பந்துகளில் 38 ஓட்டங்களையும் அணி சார்பில் அதிகபடியாக பெற்றனர்.
இரண்டு இன்னிங்ஸ்களிலும் கிட்டத்தட்ட 500 ஓட்டங்கள் எடுக்கப்பட்ட போதிலும், ஈடன் கார்டன்ஸ் மைதானம் பந்து வீச்சாளர்களுக்கு சிறிதளவு உதவியை வழங்கவில்லை.
இது போட்டியில் உள்ளூர் சாதகமின்மை பற்றிய மேலும் விவாதத்தைத் தூண்டியது.
