மோட்டோ ஜிபி தொடரின் பிரிட்டிஷ் கிராண்ட் பிரிக்ஸ் பந்தயத்தில், யமஹா அணியின் ஃபேபியோ குவார்டாரோ முதலிடம் பிடித்துள்ளார்.
இளசுகளின் விருப்ப விளையாட்டாக இரசிக்கப்படும் மோட்டோ ஜிபி பந்தயம், ஆண்டுக்கு 19 சுற்றுகளாக பல்வேறு நாடுகளில் நடைபெறும்.
அந்த வகையில் ஆண்டின் 12ஆவது சுற்றான பிரிட்டிஷ் கிராண்ட் பிரிக்ஸ் பந்தயம், நேற்று சில்வர் ஸ்டோன் சர்வதேச ஓடுதளத்தில் நடைபெற்றது.
இதில் பந்தய தூரத்தை நோக்கி, 21 வீரர்கள் மோட்டார் சைக்கிள்களில் சீறிபாய்ந்தனர்.
இதில், யமஹா அணியின் ஃபேபியோ குவார்டாரோ பந்தய தூரத்தை 40 நிமிடங்கள், 20.579 வினாடிகளில் கடந்து முதலிடத்தை பிடித்தார். அத்தோடு முதலிடத்திற்கான 25 புள்ளிகளையும் அவர் பெற்றுக் கொண்டார்.
இதையடுத்து, சூசுக்கி அணியின் அலெக்ஸ் ரின்ஸ், 2.663 வினாடிகள் பின்னிலையில் பந்தய தூரத்தை கடந்து இரண்டாவது இடத்தை பிடித்ததோடு, அதற்கான 20 புள்ளிகளையும் பெற்றுக்கொண்டார்.
இவரையடுத்து, அப்ரிலா அணியின் அலெக்ஸ் எஸ்பர்காரோ 4.105 வினாடிகள் பின்னிலையில் பந்தய தூரத்தை கடந்து மூன்றாவது இடத்தை பிடித்தார். அத்துடன் இதற்கான 16 புள்ளிகளையும் அவர் பெற்றுக்கொண்டார்.
இதுவரை நடந்து முடிந்துள்ள 12 சுற்றுப் போட்டிகளின் அடிப்படையில், யமஹா அணியின் ஃபேபியோ குவார்டாரோ ஐந்து வெற்றிகளுடன் 206புள்ளிகளுடன் முதலிடத்தில் உள்ளார்.
சூசுக்கி அணியின் ஜோன் மிர், 141 இரண்டாவது இடத்திலும் டுகார்டி அணியின் ஜோஹன் சார்கோ, 137 புள்ளிகளுடன் மூன்றாவது இடத்திலும் உள்ளனர்.
பதின் மூன்றாவது சுற்றான அரகோன் ஜிபி, எதிர்வரும் செப்டம்பர் மாதம் 12ஆம் திகதி சியுடாட் டெல் மோட்டார் டி அராகன்சர்வதேச ஓடுதளத்தில் நடைபெறவுள்ளது.
